Woch-lanmè mwen-an,
Man vini wè'w men
Abo ou pa di mwen ayen
Man santi konsidiré dlo té anvi sòti
Adan kokozié'w kon an timanmay yo té fini pichonnen
Ki sa ki pasé, lanmou-mwen ?
Mèyè ou pa anvi di mwen ayen
Mèyè sé dékourajé ou dékourajé
Men si ou té sav tout lanmou-a
Man ni an fondonk tjè-mwen ba'w
Ou pa té key kité léta pran'w kon sa
Alos, an ki lang fok mwen di'w mwen enmen'w pou ou pé sa rivé konprann ?
Souplé, di mwen sa man pou fè !
Koumansé pa anni ba mwen tout doulè'w
Men pa anni ladjé'y blip anlè mwen pas man pa an kabouré
Anplis, an jou, sé mwen ki key chimérik
Kivédi fok ou key la pou man koré kò-mwen anlè'w
Kon an kolwoch Lapwent Voklen anlè an woch i rivé touvé pou kolé-séré asou'y
Woch-lanmè mwen-an,
An lanmè-dévenn sargas ka bat anlè'w red toubannman
Men ouvè tjè'w ek kité dévenn moun-lan ritounen la i sòti a
Dayè, gadé, lorizon-an za ka vini chèché'y
Davwè i sav nou pa bizwen sa an pies sans
Kivédi nou jwenn pou migannen lavi-nou
Ek nou pa bizwen bililik zonbi-lanfè vini gaché bonnè-nou
Kidonk, Woch-lanmè mwen-an,
Man pa lé wè'w chimérik kon sa
Alos fenmen kokozié'w atjèman
Ek santi tout lanmou-a man ni ba'w-la pandan tan man ka chofé épi véyé anlè'w an lanmè-a