_ Lè mwen ka vwè-w
_ La vi ka monté an syel
_ Pou ba zétwal manjé myel
_ É fè lan nuit chanté kon toutrel
_ Lè mwen ka vwè-w
_ La vi ka chayé mwen
_ adan on bel botan
_ é soley ka lévé an kè an mwen
_ pou kléré tout lanmou
_ kô an nou pé poté
_ pwason volan ka trikoté lanmè
_ é tout pyé banbou ka rantré an pryè
_ mirak toulong alé ka ouvè chimen-aw
_ padavwa ou sé ti moun a bondyé
_ La vi pé pa monté pli ho
_ Ki la belté aw pand
_ La vi pé pa simé plis bonté
_ ki sa kè aw ka bay touléjou
_ Dlo pa ka monté mon
_ Mé lanmou ka monté mon
_ é mi lapli si tol ka chofé on dousine
_ é mi lalinn ka bo têt a lannuit
_ é mi lanmou ka vlopé tout limyè
_ mi vou mi mwen mi nou
_ konsidiré la tè jani kont a moun ay
_ sé rêvé lavi ka rêvé adan dé zyé an nou
_ lè mwen ka vwè-w
_ la vi ka dépalé
_ kon zozio an ba bwa
_ kon siklon ozabwa
_ an pa sav ki kont ou ka rakonté mwen
_ an pa sav ki bles ou ka guéri ban mwen
_ an sav on simen ni 7 jou
_ on lanné ni 12 mwa
_ mé tousa pa sa
_ pas sé-w ki kalandrié a la vi
_ lè mwen ka vwè-w
_ montagn ka ni zel
_ é sé difé tousel
_ ki pé di sa nou yé