( Asi liv-la : « Le Talisman de la Présidente » a Man Corinne Mancé Caster )
Rodrig Monfi !
An ka voyé dé mo kozé-lasa pou di-w MÈSI é anmenmtan-la fè on « mea culpa ».
Asiré pa pétèt an pa té ké janmé konnèt tout boulvès i pasé andidan Linivèsité Franco-Caraïbe–la si ou pa té voyé, jou apré jou, tousa té ka pasé dépi 4-5 lanné adan vant a Linivèsité-lasa. An té ké tann palé sa kon onlo moun épi an té ké sonjé : « zafè-kò a sé grangrèk-la, yonn ka manjé lòt pou zo, kon nou ni labitid tann pou toulésèz ka touvé-yo anho a pannyé krab-la ! »
Asiré an suiv tout frison é lafyèv a zafè-lasa parapòt a-vou Rodrig, davwa ou té on zanmi dépi sitèlman tan. Chaklè ou mandé moun lonji lanmen pou té signé on pétisyon oswa mandé prokirè-la pòté mannèv, an toujou suiv vou. An pa té ka pwan mizi a pwoblèm-la, an té ka signé POU VOU.
Kanmenmsa, POU MWEN, an té ka touvé ou té ni on don pou ékri liv é sa ou té ka maké té ka rédé sé péyi an-nou la konstwi on litérati alantou istwa an-nou, é pisimyé ou té fè sa olyé ou té pèd tan a-w adan on goumé san papa ni manman. On goumé ou té asiré pèd poudavwa sé dèyè mafyatè tini mafyatè.
Twa fwa an mandé-w woté pyé a-w adan bab a linivèsité-lasa. Prensipalman lè yo fè on palé kouri asi kont a-w kòmkwa sé vou Rodrig i té voyé on mésaj maloblijan asi « sé Giyanné-la » ( lè vou, an té sav, ou té maké « sé Giyanné-lasa »). Yo té ka di sé-w i té larézon-pou-lakòz Giyanné té mandé sòti adan Linivèsité Franco-Carayib-la pou yo té ni pwòp Linivèsité a-yo.
Twa fwa an mandé-w « démisyonné » ! Chaklè ou réponn-mwen ou pé pa fè sa san ou jen ban-mwen plis lèsplikasyon. Kifè pou mwen ou té ka pwan-w pou on kalité Zoro, ou té bizwen sé kalité goumé-lasa pou té réglé dotwa kont a moun i té anbab èvè-w, épi sé tout.
Jòdila, apré an li liv-la : "Le Talisman de la Présidente », an ka mandé-w padon.
Padon konpè, fo an té li liv-la pou té konpwann sans a goumé-lasa. A pa té anni pwoblèm a linivèsité, sété pwoblèm an-nou tout, a tout maléfis yo ka simé adan sosyété an-nou dépi lanné épi lanné.
An li ankèpa on tit a on artik « CMC règle ses comptes ». An pa li artik-la, davwa moun-la i maké sa la, pa konpwann ayen, ahak adan liv-la. Madanm-la pa ka réglé p’on kont si a pa on kont èvè limenm a-y. I té bizwen maké liv-lasa pou té rivé janmbé sa ki rivé-y adan linivèsité Franco-Caraïbe la. An touvé okontrè i gadé onlo dignité adan ékriti a-y, é i pa janmé oubliyé di kimoun i té talisman a-y épi di-yo mèsi. Adan ékriti a-y i gadé pwoblèm-la èvè délè zyé a CMC, délè èvè zyé a Prézidant-la, délè èvè zyé a Talisman limenm. Woulo pou loratèz ! Davwa dépi okoumansman a liv-la i di-nou sé on « milan » i ka ban-nou.
Mèsi Rodrig !
An ka kwè aprédavwa an li liv-lasa, an ka konpwann plibyen sa ka pasé adan on péyi lèwvwè kolonizatè-la oblijé woté pyé a-y. I ka lésé on pwazon adan nanm a sosyété-la, adan tèt a séla i pou menné péyi-la. Lè i pa rivé pwazonné tèt-la, i ka fè séla i anba la siprimé-y pou dézyèm-la pwan lanmen. On lanmen toujou sal : asiré pa pétèt !
An pa sav si sé sosyété an-nou la poko ja byen pwazonné