{{ { En Corse, après les dernières élections législatives, cantonales et municipales, faire un bilan sur la situation politique de l'île, c'est noter le renforcement du clanisme et du clientélisme et le net recul des nationalistes, avec très certainement, malheureusement, un lien de cause à effet. Le livre de José Gil, "La Corse entre la liberté et la terreur", de 1991, est plus que jamais d'actualité, même si il estimait que le seul rempart contre le système clanique pouvait être le mouvement nationaliste. Mais la corruption politique a fait son oeuvre et les dérives de quelques uns retombent aujourd'hui sur l'ensemble des hommes et des femmes qui ont sanctionné les dirigeants indépendantistes en soutenant la démarche de l'autonomiste Gilles Simeoni (fils du docteur Edmond Simeoni). Seulement, le clan est libre pour soumettre le peuple à sa guise, par toutes les violences admises, tolérées et entretenues par l'Etat français.} }}

In novant’unu, era publicata a seconda edizione di u libru di José Gil, La Corse entre la liberté et la terreur. L’autore hà analizatu à traversu u funziunamentu di u clanismu ciò ch’ellu chjama a servitù vuluntaria di a populazione, sottumessa à sta viulenza chì ùn vole dì u so nome. Qualchì strattu di sta prova ci permetterà di sottulineà l’alienazione chì tocca a maiò parte di l’omi è di e donne chì campanu nantu à sta terra. Stu studiu nantu à a dinamica di i sistemi pulitichi corsi, ùn hà persu nunda di a so pertinenza è di a so ghjustezza, dicessette anni dopu a so paruzione.

In u prefaziu si pò leghje :

« Duie parte sò in prisenza – di un cantu u putere clanicu, di l’altru u muvimentu naziunalistu. […] Ùn si sà ancu induv’ella và a Corsica, puru s’ellu si induvina chì u raportu di forze naziunalisti/Statu si scarterà in u sensu naziunalisti/partiti. A lotta diventerà più interna à l’isula, mentre chì a figura di u Statu si hà da sguassà. »

José Gil definisce u clanisimu di sta manera :

« U partitu si forma in giru à una famiglia. Imprestendu i so servizii à a potenza occupente chì l’accetta, (u Statu francese), regna annantu à e populazione detenendu u putere chì li vene di a so sottumissione. Guverna di manera schjetta l’isula, o a parte di l’isula ch’ellu hà sottu à a so duminazione (l’altra parte essendu sottu à u putere di u partitu cuntrariu). Per via di e ramificazione di fedeltà ch’ellu hà sappiutu cuncepisce – difendendu a causa di u populu ind’è u Statu, creendu dipendenze ecunomiche è pulitiche di ogni sorte –, si prisenta cum’è una spezia di « fazzione ». […] l’influenza di u partitu si face à tutti i livelli di a vita publica, à tutti i scalelli di l’amministrazione, di a ghjustizia, di l’istituzione. […] pussedendu e terre, pudia ottene impieghi, avia dinù u putere ecunomicu ; à l’accorta, cuntrullava a tutalità di i puteri. Ciò chì vole dì chì in paese, i minimi detagli di a vita cuttidiana dipendianu, per una famiglia, di i so raporti di sottumissione o di oppusizione incù u partitu chì guverna. Sta situazione dura sempre, oghje. »

Sta situazione dura sempre, oghje !

Andemu più luntanu in a lettura di sti stratti :

« A Corsica hè traversata di parte in parte da a viulenza. Viulenza non cuntrullata, o parzialmente ritenuta, ma soprattuttu chjaramente intrattenuta. U clanismu hè un sistema chì mentene intenziunalmente è strutturalmente a viulenza. […] U partitu ùn hà sempre à praticà sta viulenza, aduprendu u più à spessu di un’altra forma di viulenza, insidiosa è piatta, ma micca menu putente : quella chì forza e populazione à ubbedisce li, à seguità lu à a cechesca mentre ch’elle sò sfragellate da u so regime di sfruttamentu. U partitu hè una struttura chì funziona cù a viulenza. »

Cuntinuemu :

« A frauda, a viulenza, a corruzzione, a ripetimu, ùn ci custituiscenu più disfunziunamenti di un sistema d’altronde sanu ; ci inducenu cumpurtamenti cuttidiani accettati, valurizati, in usu chì facenu marchjà l’inseme di a struttura pulitica è suciale. »

È, per compie cù sti stratti, prima di trascrive di modu cuncrettu a so significazione :

« Ferma oghje à u populu a viulenza nata di l’incumprensione di ciò chì li accade, a rivolta liberata in u ricusu di un’altra viulenza imposta. »

À traversu sti stratti, pudimu avà stabilisce una futugrafia attuale di u statu di a Corsica in una dimensione più cuncretta. Durante l’ultime elezzione (legislative, cantunale è municipale), si hè pussutu sente in a campagna, i canditati prununcià e parulle di clanismu è di clientelismu per dinuncià ind’è l’altri, e derive antidemucratiche chì correnu in l’isula. Ch’elli sippinu stati di manca, di diritta, autunumisti o naziunalisti, ognunu ci hè andatu di a so litania. Di sicuru, si hè parlatu di più di colpacci, di diffamazione, di mancanza di dignità, di pressione murale o fisiche nantu à a persona chè di prugetti propii, di visione di l’avvene custruita nantu à a vuluntà cumuna. L’immubilismu si hè spartu nantu à tutti i territorii è ùn ci hè statu nisuna rumpitura in u sistema puliticu riprisentativu classicu. Sì i naziunalisti (intendimu quì e forze più radicale è l’elementi più muderati) pudianu esse u rampale contru à ste forme arcaiche di gestione, a situazione hè oramai bella sferente. Autunumisti è naziunalisti, dopu à tante è tante prove d’unione, sò oghje impegnati in duie dimarchje belle sferente è i risultati di st’elezzione ci schjariscenu nantu à a staccatura chì si hè fatta à prò di quelli chì credenu in una autunumia allergata di l’isula. Aghjustemu quì chì u muvimentu naziunalistu hè ghjuntu à toccà une poche di rispunsabilità in a sucetà civile : camera di i mistieri, insignamentu (Università di Corti), arradicamentu di u Sindicatu di i Travagliadori Corsi in ogni settore suciale, gestione municipale…

Eppuru, omu si hè accorsu chì l’eletturatu naziunalistu sì hè struttu è ch’ellu hà cusì indebulitu i so capimachja, incapace di purtà un missaghju abbastanza chjaru è di assume integralmente a so opposizione. In tale locu, anu chjamatu à vutà, per esempiu à u secondu giru di e legislative, per un candidatu di diritta per cumbatte u candidatu di manca è in tale locu hè statu u cuntrariu, anu appughjatu u canditatu di manca per oppone si à u canditatu di diritta. I naziunalisti eranu dunque una forza di equilibriu chì pudia fà pende a bilancia di una parte o da l’altra. Nè forza di prupusizione (fora di e tradiziunale rivendicazione legittime tucchendu à a lingua corsa, à a quistione di i prigiuneri pulitichi o quella di a speculazione immubiliare) nè trasparenza pulitica. Si capisce megliu (s’ellu si pò dì cusì) a cumplessità di a situazione. Per l’elezzione municipale, i rispunsevuli naziunalisti avianu dettu chì u muvimentu ùn accetterebbi micca chì i so militenti sianu iscritti nantu à liste di manca o di diritta. Quì torna, e cunsigne ùn sò state rispettate. In certe merrie, l’eletti chì eranu eri cunsiderati cum’è a ruvina di a Corsica, spartenu u putere cù una parte di naziunalisti è pocu impreme sì da un’elezzione à l’altra, cambianu l’ideulugie. À una direttrice di scola di u Cismonte chì dumandava à u cunsiglieru generale di u cantone, induv’ellu era statu elettu merre di u paese più impurtante (prima di lascià a piazza calda calda à u figliolu), di prutestà contru à a suppressione di una scola di a cumuna (trè nantu à u cantone), li hè statu rispostu : « Ùn site chè imbecili baulli (?) è irrespunsevuli ». Stu cunsiglieru ùn avia micca appreziatu chì una delegazione di parenti d’elevi appii pussutu manifestà a so scuntentezza ind’è u so amicu, l’ispettore di accademia.

U merre di a cumuna chì era prisente à sta riunione (dunque u figliolu di l’anzianu primu magistratu è l’attuale cunsiglieru generale) conta cinque cunsiglieri municipali naziunalisti chì venenu di esse eletti torna. Nisunu ùn si hè intesu nantu à stu sugettu (a sposa di unu d’elli, anzianu elettu territuriale, era stata direttrice di a questa scola). Si pò accertà senza troppu sbaglià si chì e derive naziunaliste anu avutu duie cunsequenze manifeste : a prima hè u rinfurzamentu di u clanismu da l’omi è da e donne chì l’anu cumbattutu dipoi avà trent’anni. In chjaru, ognunu vole manghjà a so parte di u biscottu. È cù l’imbrugliacciate di u PEI, l’appitittu ci hè. A seconda cunsequenza, hè u rinfurzamentu di u muvimentu muderatu di l’autunumisti chì vedenu ghjunghje in i so ranghi, i dillusi di u naziunalismu ma ancu ghjente di i partiti tradiziunali chì vedenu forse in sta mossa, un’alternativa nova è una sperenza chì pò esse tenuta.

E perspettive d’avvene ùn sò tantu ralegrative. Ciò chì ferma u penseru tremendu per quelli chì ricusanu un sistema inghjustu puntellatu solu da e cunniscenze pulitiche (è sti resistenti sò attivi ancu di grazia), hè a quistione di l’educazione è di u mercatu di u travagliu per una ghjuventù chì vole crede in e so scelte è in e so cumpetenze. Ma a corruzzione ramentata da José Gil tocca ancu l’elementi chì ùn sò ancu guasti da l’unifurmizazione di l’esse è a standardizazione di u pensà. Ognunu vole assumiglià si à i criterii ch’elli stabiliscenu i media, e mode, a traputenza di a cumunicazione, i preti di una prupaganda ecunomica è culturale. U travagliu ùn paga più ! A pussibilità di accede à u sapè è à a cunniscenza hè una primura secundaria. À stu livellu dinù, u putere stabilitu ghjoca u so rollu perversu. S’ellu si dumanda oghje in Corsica à un giovanu di parlà di i so prugetti persunali, a risposta hè pronta è lesta : entre in l’amministrazione. Ciò chì era d’attualità eri hè è fermerà più chè mai d’attualità. Una piazza à u Cunsigliu generale hè a sola mutivazione per un giovanu, diplumatu o nò, degnu di stu nome.

L’impieghi eletturali anu infracicatu ogni vuluntà. U bigliettinu di votu per una piazza in l’amministrazione. Stu sistema di viulenza è di corruzzione si nutrisce dunque di sta manera è nasce tandu sta nuzione di « servitù vuluntaria » cum’ellu a chjama José Gil. A Direzzione di l’Intervenzione Sanitarie è Suciale custituisce forse a più famosa riserva per i merri o i cunsiglieri generali chì spachjanu à più pudè. I varii uffizii di a Cullettività territuriale (tutti sottu à u cuntrollu di i partiti tradiziunali) intrattenenu u sistema. D’altre strutture chì dipendenu direttamente o indirettamente di u putere puliticu ponu esse generatrice d’impieghi eletturali è quellu chì riesce à « entre » (hè u termine in usu) à u Parcu regiunale, per esempiu, sà ciò ch’ellu deve è à quale u deve. In stu casu, bellu à spessu, ùn si parla nè di cumpetenze nè di cuncorsi, nè di diplomi, torna una volta.

È s’ellu si tratta di suvvenzione, attribuite à ogni attore culturale, s’omu parla di pensione o di allucazione date per ghjente chì ùn ne anu bisognu, s’ellu si ramenta pensione o allucazione ricusate per ghjente chì ne hà propiu bisognu, l’esempii facenu vede una realità nera, assuffuchente, pessima ma reale, tristamente vera. Ma per i più debuli (quelli chì ùn anu micca a manica longa), a rivolta ùn hè più liberata. Hè un sintimu di umiliazione chì esiste, ma un’umiliazione rientrata, piatta in a so cuscenza, è disgraziamente chì ùn si pò trasfurmà in rivolta ghjustu à puntu. Ùn anu nunda per pudè risponde à sta forma di viulenza. A rivolta hè u privileghju di quelli chì anu a panza piena.

{{Pierre-Joseph Ferrali}}