I té sentjè-d'laprémidi
Soley-la té ka désann dòmi.
I té sentjè-d'laprémidi
Mwen té la
Ka gadé soley-la
Wouj, wouj, wouj kon an tomat,
Ka pété difé,
Ka désann tou dousman,
Ka fini adan gran lanmè-a.
Adan an pié-palmis,
An mitan an savann
Mwen ka tann yan boukan,
Yan kalté wélélé, yan kalté vidé,
Yo tout té ka chanté an menm tan,
Yo té ka chanté, yo té ka chanté,
É di'w, mwen té ka trouvé sa bel,
Sa té bel !
Sa té ka fè mwen plézi.
Tann sa tibren, tann sa manmay,
Tann tousa mel
Adan pié-palmis la ka chanté.
Mwen ka tann yo toujou
Adan tet-mwen
Ka chanté, ka chanté.
Vini kouté sa an jou, manmay,
A sentjè-d'laprémidi,
Adan pié-palmisla.
Lè'w ké fini kouté sa
Épi ou ritounen la'w ka rété a
Rue numéro 16, Allée 125, Bloc D, Escalier 15,
Logement 764,
Ou ké tann sé mel-la ka chanté
Toujou adan tet-ou.
Vini an jou kouté sa !
Serge RESTOG, Enfants sans rires, sans jeux, sans joies, Autoédition, 1981