Dépi koumansman lanné a, an liannaj épi KM2 (Krey Matjè Kréyol Matnik), Guylène Régal, mètafè émission « Sé ta nou » asou Zouk-TV, ka ba matjè kréyol lapawol, chak primié vandrèdi mwa a, dépi 3 zè dlaprémidi, pou 4-è-édimi. Sé an émision espésial « Sé ta nou » i kriyé : « Pawol palé, pawol matjé ».
Asiré pa pétet, dan tout Matnik, sé sel émision télé, ki ka palé di machokay kréyol, di litérati kréyol, épi ki ka pèmet matjè palé di travay yo pandan an tan asé lonng pou yo di tousa yo ni an tjè yo.
Nou bokanté épi Guylène Régal, asou lavi’y, travay li Zouk-Tv, divini kréyol la….
***
Dabò pou yonn, man ni 58 lanné ; man mayé, man ni 3 yich épi 5 ti yich ; sa ka fè 12 lanné man réyalizatris ek animatris anlè Zouk TV.
Man sé an militant ; dépi 12 lanné, kon yo ka di an fransé, man « bénévol » anlè Zouk TV pou vréyé douvan lang péyi a, kilti péyi a. Sé an zanmi mwen, Daniel Boukman, ki ba mwen lidé palé di lang ek kilti kréyol anlè Zouk TV.
Sé ti yich mwen yo ka kriyé Alisia, ki ni 8 lanné, sé li ki fè mwen li « Lou-a ki té lé bokanté koulè », an pawol-matjé Daniel Boukman. Primié liv man li tousel, sé « Ti anglé a », éti sé Misié Hugues Barthéléry ki matjé’y. Sa pa té ralé chez bò tab, men man fini pa rivé an bout chimen an !
Divini lang kréyol la ? I ké sòti anlè ti ban-an éti sèten moun lé kité’y asiz la…Lang kréyol la ké mété kòy doubout an manniè djok lè ou ké wè, dépi latit jik Linivèsité, moun ké aprann li’y épi matjé’y. Lang kréyol la ké wouvè gran zel li chak lè artis, chantè, chantez, ké chanté’y an manniè ki pa tjòlòlò.
Adan liv, flim siléma, nan radio, télévizion, téyat, nan lapriyè, sé konsa kréyol nou a ké kapab ba bel flè, bel fwi !
***