Ou ka viv adan on péyi, on tililèt an vérité.
Ou tousèl a-w sèk k’on kayi, a pa on sò ou mérité.
Es sé konsa moun pou ka viv ? Anni grenn-sab tout aladriv !
Tan ka pasé, ou fin izé, afòs èché lonji-lanmen.
On lilèt moun-kolonizé, ola pa ni yè ni dèmen.
Es sé konsa moun po ka viv ? Anni grenn-sab tout aladriv !
Ou tousèl a-w sèk k’on kayi, alantou a-w yenyen pwan zèl
Onsèl lidé ka ann’ vayi-w, chakmoun-chakmoun, sa i fèt bèl
Es sé konsa moun pou ka viv ? Anni grenn-sab tout aladriv !
Ou ka maké, ou té ké vlé moun di-w tibwen si lapenn vo
Olagyab ! Tout bouch bouklé, sé bèkèkè-kokofyolo.
Es sé konsa moun pou ka viv ? Anni grenn-sab tout aladriv !
Chakmoun-la k’on kyo si on kay, byen mansousyé sa lòt ka fè
Kijan, ola péyi-la k’ay, sav si lévwaz a-y ka soufè
Es sé konsa moun pou ka viv ? Anni grenn-sab tout aladriv !
Alantou yenyen ka pwan zèl, toutmoun ka sanm antdévitès
Kolonizé pa ni larèl, Kolonizatè-la, li, mètpyès.
Es sé konsa moun pou viv ? Anni grenn-sab tout aladriv !
(Kapèstè Bèldlo 24/07/2017)