Mwen maké tèks-lasa an kréyòl-gwadloup. An touvé lenspirasyon adan sa yo ka kriyé « Le Testament de Baltimore », on poèm (Desiderata, 1927) a Max Ehrmann (1872-1945). Mwen pa mofwazé-y an kréyòl chouk- pou- chouk. Tèks an-mwen pa menmparèy a ta Max Ehrmann. Mwen enki voyé douvan sé lidé-la ki té ka sanm mwen fondal adan pawòl-maké a-y.
Vansé san loprésyon adan foulmoun-lasa ka touné-viré.
Rété nofwap sé on bon rimèd.
San jen lagé ayen ki fondal, fè tousa ou pé
pou pa jen kòlè évè ponmoun.
Sa ki lavérité silon-w, di-y san bigidi.
Lè on moun ka palé ba-w, kouté-y, menm si i pa gè ni lèspri,
Davwa moun-la, kon vou, i viv é i konnèt lavi.
Lè on moun égri vlé fè-w lapenn
Bay masko, osinon ou ké pèd tout fòs a-w pou ayen.
Pa gadévwè twòp kijan lézòt ka viv,
Pou ou pa divini owgèyèz oben jalou,
Pas ou toujou ké touvé on moun
ki pli chanslé oben mwens chanslé ki-w menm.
Lè ou ni kèk bik adan lavi, kyè a-w kontan,
Fòsé pou bik vwè bout, ou ké adoumanman.
Chaché sa ki bon adan sa ou ka fè
Menm si sa ou ka fè-la pa gè ni lentérè,
Lè ou ké pasé penn é tribilasyon,
Sa ké ba lèspri a-w on bèl favè.
Onlo moun anba-anba. Fò ou véyatif,
Pa ba nanm a-w vèglaj,
Fò ou vwè moun ki fwanch.
Onpil moun ka goumé pou on gran lidé,
lonnè é rèspé ba sé moun vayan-la.
Toujou rété sa ou yé.
Pa jen fè lasanblan enmé,
Pa jen fè jé évè zafè a lanmou,
Latè té ké lanfè si pa téni lanmou.
Laj ka monté asi tèt a-w,
Pa goumé pou jennès pa channda,
Tan ki pasé ba-w lasajès.
Anfenfon a kyè a-w pa jen pèd lafwa,
Lè malè ké tonbé si-w ou ké sa kenbé.
Lè ou las, lè ou tousèl, lèspri a-w chouboulé,
Fò ou sa rézisté.
Dégoudi kò a-w men pa fè-y soufè.
Toujou sonjé, pyébwa, zétwal é vou osi,
Zò sé menmparèy, bèl zanfan a latè,
Toujou sonjé, si ou la, ou andwa.
Asiré pa pètèt latè ké toujou touné kon i dwèt touné
Kifè kèlkanswa non ou ka ba bondyé,
Fè tou sa i fo pou toujou viv adan lapé évè-y.
Lavi sé on fanm fòl men lè ou ka travay, lè ou ka èspéré,
Fò ou viv adan lapé osi épi vou-menm.
Dépawfwa nonm é madanm ka soufè, ka rèvé initil,
Mé toujou sonjé magré sa nou ka kwè
Lavi sé on bèl donézon.
Marie-Noëlle RECOQUE DESFONTAINES