Nan bonmitan Mondial-la ka woulé atè la Risi a, nou apwann ki Cristiano RONALDO, mapipi foutbalè Real Madrid la, ké riijwenn an lot kleb séleb, men nan péyi Itali kou-tala : la Juventus ki tout moun ka kriyé "la Juve". Wotè lanmonné a éti kleb italien an mété déwò a pou sa genyen jwè pòtidjé a sé 105 million éwo kivédi an bidim lanmonné toubannman.
Men transfè-tala rété nan fal yonndé moun, soutou travayè lizin Fiat. Poutji ? Sé davwè fanmi-a ki pwopriyétè la Juve a, lé AGNELLI, sé yo menm ki pwopriyétè lizin loto tala tou. Sé travayè-a vréyé vokal ek mété kò-yo an grev davwè yo di sé an vié ti lanmonné-kod yo ka trapé kon salè aloski RONALDO ké risivwè 100 éwo chak minit ka pasé. Ki i jwé ki i asiz anlè ban touch la !
Pou-tout-bon, lè nou ka gadé lanmanniè travayè ka pijé, ka pwan fè, anba sistenm kapitalis la, nou blijé rikonnet ki sé ouvriyé Fiat la ni rézon sispann travay. Men, nan menm lè-a, ki moun ki ka foulbak sé istad-la chak simenn (délè dé fwa nan simenn-lan) ? Sé pa astwofizisien, sé pa doktè, sé pa avoka, sé pa miliardè, sé pa pwofésè linivèsité. Lè ou wè ni 30.000 "tifosi" ("sipòtè" nan lang italien an) ka plen an istad ek chak adan yo ka achté an titjé 10 éwo (si sé pa plis !), 80% adan yo sé travayè. Chak mwa ni omwens 4 match ka woulé kidonk anni katjilé konmen lajan sa ka rapòté kleb foutbol la ! An boul lajan toubannman !
Kidonk sé travayè yo menm ka pòté lajan ba la Juve pou i sa péyé jwè kontel RONALDO...