On tipawòl ka di :
Sé sa i bizwen difé i pou maché si lafimé
Si zò pwan tan kouté zò ké vwè kijan pawòl-lasa vré.
Gadé kijan on Sikanalis é on Langannis
touvé-yo èstébékwè douvan on pwoblèm ankòltaré (/pri adan on anmègdasyon) adan péyi a yo.
Mi :
On jou Sikanalis-la vansé p’asii koté Langannis-la
épi i di-y konsa :
- Kouté Mèt, chak jou jou fè jou, an ka tann moun ka plenn.
Yo ka di lavi a-yo ka touvé-y makonné ( / antòtiyé) adan on lagliyaj-sèks
é pwofitasyon i pa ni non, san papa é san manman.
Kijan, an lang an-nou, moun ka kriyé, sa an lang-fwansé yo ka di “pervers sexuel” ?
Langanis-la réponn Sikanalis-la :
- Wopso ! Kouté madanm an-mwen chè
mwenmenm an-mwen an pa konnèt
mé an kay mandé-moun adan laliwondaj (/lanviwonnaj) an-mwen.
Sa pé tini désèrten mo, noumenm langannis, nou pa konnèt.
Tan fè tan, dé mwa pasé, mé sa té ké pé dé lanné.
Langanis-la woupwan lang èvè Sikanalis-la é ba-y pou larépons :
- Mi, an mandé moun adan lantouraj an-mwen é dapwé sa yo ka réponn an ka byen vwè a pa sa ou ka chèché la. P’asi on bò tini moun ka ban-mwen : anvyolè, dékalfoukè, dévè, déjennfitè, dédimwazélè, malmaké p’asi on lòt bò yo ka envanté mo pou fè-mwen plézi kontèl : pèvèsè, pènisyè, malvèsè, moun a mové mannyè épi…épi…
Mé an pa ka kwè sé sa ou té ké vlé nou touvé.
Dé grangrèk-la té la, byen bèkèkè
lè on Tipastè Témwen-Jéova oswa Evanjélis té la
i té kouté-yo palé
i ba-yo on lèspikasyon :
- Mwenmenm an-mwen osi an ka tann é an ka kouté, chak jou Bondyé fè jou, moun ka palé anbafèy asi sé malélivaj konsa zòt ka di la.
Mé fo zòt konnèt on tipawòl moun kotésit ka di :
si ou pa vlé lévwaz a-w konnèt zafè a-w, sé sizé si kaka !
Sikanalis-la é Langanis-la, bita-bita, réponn an menm tan-la :
- Sizé si kaka ?
- E wè ! Ou ka sizé asi malpwòptaj a-w pou moun pa vwè sa i sòti an boudin a-w.
Lèwvwè on vis anvayi moun pou sé onsèl manjé-kochon
ola onlo moun ka touvé lavi a-yo
alòs
sé kwa si bouch
ou pa ni vwè ni tann
ou pa ka palé sa menm
pa menm ba van-la
pou i pa chayé pawòl-lasa alé.
Kifèwvwè pou, asiré pa pétèt
sa pa kay répété an p’ontan
p’onkoté
Alòs-é-poulòsdonk
pa menm tini mo pou nonmé sa i ka pasé !
- E alòs ?
- Alòs, anni kouté é konpwann onlòt tipawòl a moun kotésit palapenn ou ay kyoké kaka pou vlé konnèt si i ka santi !
Konmè Sikanalis é Konpè Langanis rété brak.
Yo toujou la ka kalkilé. Poukisa :
Lè on biten pa tini p’on mo pou nonmé-y
sé konsidi biten-lasa pa ka ègzisté !