Lè ou wè vakans rivé, ni sa ki enmen ritwouvé kò-yo asou lawout, abò loto oben lotobis. Ni jis sa ki ka fè istop tou lé jou pou alé lanmè kon tout moun
Épi, i ni sa ki ni chans monté adan niyaj kivédi adan kisasayésa model avion. Men délè, sel manniè pou dékouvè dot péyi adan Karayib-la, sé monté abò bato ki ni.
Men, sé pa tout moun ki kantékant épi bato-a kivédi épi lanmè-a. Sé pou sa fok nou tout-la rivé konprann sa pou sispann malmennen sé moun-tala pas sé yo sel ki sav sa yo ka sipòté abò bato.
Ek délè, pandan pasé katrè di tan !
Kidonk, yo pa menm pé manjé ek brè. Yo pa men pé tounen tet-yo oben lévé maché titak ek yo ka trapé fonmi adan pié-yo. Kifè, yo pri adan an menm koté ek yo la ka espéré touché tè abo bato-a fini pati épi yo. Yo ka jis mandé kò-yo ki djab ki vréyé yo adan model viérev tala.
Men, asirépapétet, lè yo ka répété ti pawol-tala, yo ka rivé touvé lafos pou tjenbé red :
"Sa pa dlo pou mouyé mwen ! Man key rivé batjé anlè bato-a pou alé-viré adan tout Karayib-la "
Épi zot sav ki sa ?
Sa ka maché toubanman si moun-an pa ka ped fwa douvan sé manman vag-la ki paré pou soukwé bato-a kon an chacha.
Pas, menm manniè ou wè an viérev ka bout lè ou ka ouvè zié'w lé bonmaten ansanm épi soley-la, an tout manniè, bato-a key rivé koté-a i ka alé a, épi tjè épi kouraj.
Ek, an lot jou, sé moun-tala menm ki key mandé batjé anlè tout kalté bato pou alé-viré adan tout bel Karayib dlo blé a pas i key chonjé sa poko dlo pou mouyé'y an pies sans toubanman.