Abo nou an bonmitan sézon karenm kivédi an sézon ki sek kité sek ka alé, tout sé dènié simenn-lan, Matinik risivwè an patjé lapli toubannman. Mé jòdi 16 avril tala, dlo dépasé farin ! An kalté model dlo anni dédjeldésann di siel-la ek anni fésé kò'y atè an manniè rachmabab.
Pliziè komin kontel Fanswa, Wobè, Gwo-Mòn touvé kò-yo anba dlo kifè sirkilasion loto té blijé sispann. Pli red ankò : apochan 2.000 zélev lékol Fanswa èvè met-lékol yo rété pri adan lékol-yo ek sé la yo ké pasé lannuit -yo. An koko-makak kon sa pa janmen rivé nan komin-tala !
Men bagay ki fè moun soté plis, sé lè yo wè ti grenn laglas ka chapé-désann di siel-la tou. Sé ki sa bagay-tala ? Non'y sé lagrel. Bagay ou ka wè anni adan péyi ki fwet kontel la Fwans oben l'Anglitè. Kidonk nou blijé mandé kò-nou ki sa ka woulé la-a ? Es pétet an jou nou ké trapé lanej tou si sa ka kontinié woulé kon sa ?
Atjelman, pèsonn pé ké pé di ki klima latè pa dérayé ! Epi lo polision-an sé gran péyi-a ka dévidé toupatou a, lanati li-menm pa sav ki manniè pou i mété kò'y ek i blijé déviré larel. Kifè lagrel pé tonbé adan an péyi ki tropikal kontel Matinik. Mi bab, manmay !...