Accueil

INSTITUTO ALSA PAPIAMENTU KE INVITÁ UN I TUR PA BIN SELEBRÁ SU ANIVERSARIO

INSTITUTO ALSA PAPIAMENTU KE INVITÁ UN I TUR PA BIN SELEBRÁ SU ANIVERSARIO

Na 1994 Gobièrnu di Kòrsou a disidí ku ta nesesario pa 30 di mei ta un Dia di Konmemorashon. Tin diferente opinion tokante kiko ta e kousanan di 30 di mei 1969 i kiko ta e konsekuensianan. Opinion general ta ku e susesonan ku a tuma lugá na 1969 ta un di esnan mas violento ku Kòrsou a konosé despues di e periodo di sklabitut. Pero 30 di mei tabatin un banda positivo pa kultura i identidat di pueblo di Kòrsou. Ta konosí ku Papiamentu a hunga un ròl desisivo durante e proseso pa yega na 30 di mei (Vitó). 

Durante e dia mes, esta 30 di mei 1969, Papiamentu tabata e idioma di identifikashon di partisipantenan den e movementu. Djis despues na 1975 e tabata un di e motibunan pa e lucha sindikal di maestronan di skol di mas largu di historia (21 dia). P’esei Instituto Alsa Papiamentu a skohe e dia aki pa konmemorá su eksistensia. E aña akí ta 49 aña despues i e di 7 aña ku Instituto Alsa Papiamentu ta dediká na un tema tokante desaroyo di Papiamentu den komunidat. Nos lenga entretantu a avansá masha tantu den e proseso pa bira lenga di país, di gobièrnu i instrumento klave di enseñansa i komunikashon di pueblo. Pero unda Papiamentu ta pará pa loke ta e mundu digital? Ki grado di strukturashon nos konosé pa loke ta nos ortografia den programanan manera Word i riba Internet? Kon Papiamentu ta kompará ku otro lenganan krioyo pa loke ta nos presensia riba Facebook, YouTube, Instagram i Twitter? Kiko nos por haña na informashon tokante nos lenga riba Internet? I finalmente, kon ta para ku e ‘locale’ di Papiamentu? Kiko e ta? Ki benefisio e tin? I kon nos lo ke strukturá su kontenido pa nos lenga ta rekonosibel riba Internet?

Dia 30 di mei próksimo, algun profeshonal lo diskutí ku invitadonan i pueblo en general to- kante e diferente aspektonan akí i nan influenshá riba Papiamentu.

 Dr. Marta Dijkhoff huntu Ace Suares di Suares & Co lo tene un introdukshon kòrtiku di logronan di Papiamentu den mundu digital. Rendel Rosalia lo presentá e proposishon di e dos Fundashonnan Alsa Papiamentu i Kòrsou Habrí pa un ‘locale’ di Papiamentu. Nos lo tin ademas un entremedio kultural ku ta un sorpresa. Ku e aktividat akí Instituto Alsa Papiamentu ta spera di por yega huntu ku gobièrnu na un kuadro pa determiná un ‘locale’ pa Papiamentu i fiha (huntu ku gobièrnu) algun aspekto di nos idioma den e era digital aktual.

Pages