Accueil
Aimé CESAIRE
Frantz FANON
Paulette NARDAL
René MENIL
Edouard GLISSANT
Suzanne CESAIRE
Jean BERNABE
Guy CABORT MASSON
Vincent PLACOLY
Derek WALCOTT
Price MARS
Jacques ROUMAIN
Guy TIROLIEN
Jacques-Stephen ALEXIS
Sonny RUPAIRE
Georges GRATIANT
Marie VIEUX-CHAUVET
Léon-Gontran DAMAS
Firmin ANTENOR
Edouard Jacques MAUNICK
Saint-John PERSE
Maximilien LAROCHE
Aude-Emmanuelle HOAREAU
Georges MAUVOIS
Marcel MANVILLE
Daniel HONORE
Alain ANSELIN
Jacques COURSIL

Dékolonizasyon épi Lendépandans

Hector Poullet
Dékolonizasyon épi Lendépandans

   An lanné 2020 sa ké fè 60 lanné  Gouvèlman Lafwans désidé swadizandi dékolonizé sé ansyen péyi-la i té ka kolonizé-la dépi syèktan. 

   Sé konsa onlo péyi trapé lendépandans a-yo, avè gouvèlman a-yo, é désidé yo té kay pé fè politik a-yo, dévoplé kilti a-yo, lékonomi a-yo, é tout richès yo té ni adan péyi a-yo. 

   Yo trapé anbasadè a-yo é yo touvé-yo èvè on rèprézantan adan ONU é tout òwganizasyon enternasyonnal kontèl  FAO, UNESCO épi kisisayésa …

   An ka sonjé sé lanné 60 lasa jan dotwa zanmi afriken an té ni té kontan.

   Déparfwa, lè yo té ka fété Lendépandans a-yo, yo té ka fè jé èvè nou sé Antiyé-la, nou i té sitèlman kontan rédé Lafwans adan lantoupriz a kolonizasyon a-y. 

   Nou Antiyé é Giyàné nou té ka rété bèkèkè. 

   Mé nou pa tadé konpwann Lendépandans  a pa  on biten yo ka bay, lendépandans sé pou raché é wouplanté é penga kolonizasyon pa woupousé onfwa-lamenm.

   E menm lè ou rivé trapé-y afòs fè, kolonizatè-la toujou ka lésé on bonm an péyi, on bonm byen kaché adan nouvo gouvèlman « endépandan »-la  pou i pété pli ta siwvwè i pa ka rivé kontinyé sousé richès a péyi-la.

   An 2020 on ékip télévizyon fwansé kay fè on séri flim asou « La Décolonisation ». Asiré pa pétèt ké ni on paj asi Lézantiy é Lagiyaàn: kijan fè nou pa trapé Lendépandans an-nou kon sé lézòt koloni-la adan menm balan-la ?