Vandrèdi 13 janvyé 2017 an wousouvwè on mesaj Pè Albè Blanchard té voyé ba Agnès é Janmari :
« Chérubin a vécu le passage vers le Père dans la matinée, les funérailles… »
An rété onjan brak pannan on minit, konsidiré Chériben té chayé-alé èvè-y tibwen an-mwenmenm an-mwen, atoupannan i té ka lésé andidan-mwen tibwen limenmenm a-y. On bokantaj, tibwen Chériben té rété adan mwen, tibwen Ektò té pati èvè Chériben….an frisonné !
A pa pou di nou té sitèlman zanmi, an té konnèt-li byen é an té ka rèspèté sa i té ka fè, é jan i té ka fè-y, kanmenmsi an pa té ka kwè menmjan èvè-y, Bondyé an-nou té ka sanm onlo davwa nou té ka woulé pou ni plis bonnè-séparé ant moun asi Latè é mwens pwofitasyon alantou an-nou.
Lè i té fè grèv lafen-la a Kadèt, menmjan èvè onlo moun Gwadloup, an té ay pasé on lannuit sizé ora a-y adan légliz-la, pou montré nou té la é nou té dakò èvè konba-la i té ka menné la adan kominoté krétyen Sentwòz.
Plita, lè an vini apwann i té anlagyè èvè mè Bouyant pou sav kimoun i ni pou kondui kominoté kwayan andidan légliz-la an té dakò osi èvè-y pou di on mè pa ni pou vini vlé fè lalwa adan on légliz kanmenmsi sé li mè a komin-la ka mété on lajan pou finansé batiman-la.
Mé prensipalman an té enmé jan i té ka fè lanmès a-y, an kréyòl, pou fè toutmoun konpwann sé noumenm ki Bondyé, sé andidan nou i yé, é nou pé pa palé èvè-y onlòt lang ki tala nou konnèt plibyen la. E sa té menm biten-la pou tanbou-ka, asiré Bondyé té ka konpwann é aprésyé mizik-lasa davwa sé-li Bondyé té ka ritmé pwòp konsyans an-nou. Jòdi mésaj-la konmansé pasé.
Chériben alé…. menmjan èvè Dany é Claude, menmjan èvè Sony é Jòj, menmjan èvè Loran é Yvon, menmjan èvè Jéra, menmjan èvè Donald…. E yotout ka pati èvè on tizòy an-nou, yo ka chayé-nou alé èvè-yo atoupannan yo ka lésé on titac yo adan mémwè an-nou.
Sé konsa, èvè sa nouchak ka fè pou noutout, sa noutout ka fè pou nouchak, sé konsa on pèp ka konstwi istwa a-y mizi an mizi, èvè fanm, èvè nonm, pou rivé fè on pèp majè i ka dérifizé rété anbajouk a ondòt pèp.
Chériben mèsi pou sa ou ka lésé ban-nou adan nou, é bòn vwayaj frè-la, pannan tout tan-la ou ka atann nou vini jwenn vou la. Nou, nou pa sitèlman présé.