Adonis té on bèl tigason.
Pou jou fèt a dis lanné a-y
fanmi a-y té fè-y kado
on tikochon !
Adonis té ba tikochon-la non
« Poutou-poutou »
davwa sé konsa moun péyi-la
té ka kriyé kochon an tan-lasa.
Tikochon-la té ka viv lib alantou kaz-la
é lèwvwè tigason-la té ka kriyé :
Tikochon-la té ka rivé andidan-la
onfwa-lamenm.
Adonis té ka bengné-y, pwòpté-y
Suiyé-y
té ka ba-y manjé
pen é konfiti a gouté a-y
té ka graté anba vant a-y.
Poutou-poutou té ka tonbé blipman
ka dòmi, ka wonflé.
Adonis té kay lékòl
tikochon-la té ka suiv li
k’on tichyen
té ka atann kouché atè-la
douvan-pòt lékòl-la
té ka atann tigason-la sòti
pou té déviré èvè-y akaz a-y.
Epi on jou
Poutou-poutou ay bouré
jaden patat a on lévwaz.
Ka i pa té fè la !!!
Misyé pa pwan-sa menm.
I ba tikochon-la bwè
on kwi plen dlo-mannyòk !
Poutou-poutou vwè i kay mò
i ni tan déviré akaz a fanmi a-y
pou i té mò an dé bra tigason-la.
Adonis pléré, chigné, hélé malédisyon
Asi tèt a Kèlè salté-la.
Kèk tan aprésa
Yo di Misyé té anni mò li osi
I monté an Galilé !
I ay jwenn Poutou-poutou
an syèl a tout kochon.