Dans les pas de Guy Tirolien
Pour marquer le centenaire de sa naissance,
en hommage à la Journée Internationale du créole
Mwen osi an ni ti rèl-sigré an mwen séré kon biki an pòch-dèyè
Mé prangad rapòté sa lè van pichòt ka langanné
Ni douvan bannélo moun ka ba lari chenn
Yo ké fè jé èvè tèt a-w ou sav
Dapré mwen
Sòlèy sé on bèl zé pèwlouz klérant kon klendendeng
Lannuit ponn
Dapré mwen priyé-dyé-Bondyé ka déviré désann asi latè
Kon fifiné dousin an dé koko-men ki lonji-douvan
Dapré mwen zétwal lanké an syèl sé nanm a nonm trépasé ka boukanné
Dapré mwen latè sé on zoranj yo mété la èspré si an ka Bondyé swèf
Dapré mwen bèl ti flè ka monté janbé founèt
Pou dousi hokèt an kè a négyon ka pléré gwo-dlo
Dapré mwen on wòch sé on pyébwa kapon ki pa té nòz profité
Dapré mwen ou ka jwenn épi labonté yenki
Lè-w rivé dépozé blès a doulè ki two pézan dèyè do a-w
Dapré mwen yonn é yonn ka fonn adan onsèl kò
Menm lè fè lanmou ka pran kadans a konba
Dapré mwen sé lodè a swé touné an san tousèl
Ka fimayé flè pou awtis fè bèlté pròspéré
Dapré mwen sé afòs nou ké enmé nou
Dèmen jou ké fin pa ouvè èspré pou nou…
Max Rippon. Bitasyon Durocher. 2016-10-28