J’ai regardé dernièrement un clip vidéo dans lequel Jocelyne Béroard chante « an limiè » avec comme invitée (featuring), Sista Tchad. Je me suis souvenue qu’il y a longtemps, j’avais rencontré cette Guadeloupéenne chanteuse de musique dancehall. Un jour, elle avait vu se produire sur une plage deux Martiniquais, qui « mettaient le feu ». Elle s’était dit qu’elle devait « sauver l’honneur du pays ». Pour pouvoir chanter avec eux, il lui avait fallu s’imposer. Son récit m’avait fait sourire et à l’époque, pour m’amuser, un peu comme un exercice de style, j’avais écrit ce texte.
O ! Lézòm ! louké ! louké !
On bèl chèr ka gadé nou.
Ti chabin, mi nou ! Mi nou !
Nou ka chanté, ès ou enmé
Sa nou ka fè ?
Wè, sa bèl, wi.
Men, mwen osi, an ni on vwa,
Es zò anvi
Tann mwen chanté évè zòt-la ?
Awa! Awa !
Nou ka chanté mizik dancehall,
Ka ou vlé fè si on podyom ?
Ou tou kagou, ou flègèdè,
Fin kon zarinyé, kon vè.
Dapwè zòt an pa ni ras,
E zò pa vlé ban mwen on plas.
Zò enmé fanm ka liyanné,
Tifi ochan ki sa dyézé,
Fanm a chalè ki ozabwa.
Tansyon a zòt ! Penga ! Penga !
An pa tizi kon zòt ka di.
Mizik a zòt ka fè moun bobi.
An ké ba zòt on bèl bèl plich,
Zo ké kouri adan katich.
Mwen Sista Tchad, an ja paré,
E zò tout ké pé chigné.
Zòt grandizè, zòt anrajé,
Zò kay kriyé tanpri souplé.
Lézòm ès zò tann ?
Ka madanm-la ka konpwann ?
Nou sé dé malboug,
Nou pa ka fè poud.
Mizik an-nou pa ti zafè.
Sizé pou tann
Sa nou ka fè.
An ja tann zòt, sa anmègdan.
Mizik a zòt sé lantewman.
Zòt ka vann van pou achté lè,
Pawòl a-zòt sé on mizè.
Mizik a zòt sé landomi.
O dòktè-la ? O lopital ?
An ja trapé on langoudi !
E tèt an-mwen ka fè mwen mal !
Ti madanm-la vréman chachtren,
Nou pa jen mandé li ayen.
Annou gadé sa i vlé fè,
Es i ni fyèl, ès i blagè.
Mwen Sista Tchad an ja paré,
Mwen Sista Tchad an vlé goumé.
Koulèv an toch pa ka grosi,
Talè zò ké di-mwen mèsi.
Dakò ! Fo mwen ba zòt on pal
E fo nou ka bay bal.
Evè zòt lang sé baton,
Evè mwen, pawòl sé plon !
Frè, annou ba onlo bòk !
Frè, annou ba onpil kyòk !
Frè, annou ba kèk tobòk !
Zòt pa té vlé tann mwen chanté,
Konnyéla an ka asiré.
Sista Tchad pa pliyé,
Locks a’y ka dansé,
Sista Tchad ka menné !
Marie-Noëlle RECOQUE DESFONTAINES