Erisi konstwi an bidim lopital adan an batzié pou sa swen moun ki trapé "Coronavirus" la, sé pa rédi chez bò tab abo la Chin sé an péyi ki ni pres 1,5 milia moun. Abo la Chin sé dézienm pi gwo pouvwè rékolonmik asou latè. Abo Chinwa sé moun ki pa pè travay, ki pa pè djoubaké bomaten-an-midi-oswè lè zot wè sa nésésè.
Sa ki dèyè sa ni an non. An sel non : volonté politik.
Sé vré ki la Chin pa an démokrasi kon nou ni labitid konsivwè'y la kivédi i pa ni pliziè parti politik (sé Parti Kominis la ka mennen li yonn), pa ni jounal, radio ek télévizion ki pé krititjé gouvelman-an ek lè ou sé an moun ki kont réjim-la, lè ou sé an grangrek ka noz matjé kéchoy kont li, i pa ka ped tan fèmen'y lajol. Sa vré ! Mé, dé sèten lè, adan dé sèten péyi, sa nésésè, sa endispansab menm ki ou ni an pouvwè ki fò, ki djòk, soutou adan dé sitiasion ki rachmabab kon ta "Coronavirus" la.
Moun ké di sa yo lé, men rézilta-a douvan zié-nou : pouvwè chinwa érisi mété doubout flip-flap an lopital ki pé swen pasé 10.000 moun ki malad. Konmen lajan sé travayè-a dwet trapé ? Pétet an lanmonné-kod. Konmen adan yo ki trapé lanmò-yo adan sa pis adan zafè konstriksion batiman, toujou ni aksidan ka fet ? Nou pé ké janmwen sav ek pouvwè chinwa pé ké janmen di'y, men, asiré-pa-pétet, dwet ni yonndé travayè ki ped lavi-yo adan balan-an chantié-a té ni a.
Tout sé bagay-tala vré, mé fok nou sa rikonnet tou, rézilta an volonté politik. Pa ni pies sitiasion asou latè, adan pies péyi, ki dézespéré. Dépi sé politisien-an sérié, onnet, désidé pou sa goumen ba péyi-yo ek popilasion'y, ou blijé touvé tjek solision menmsi i pa obidjoul a 100%. Sé pa an sel lopital, abo i bidim kité bidim ka alé kon ta Wu-Han la, ki ké rivé koré lépidémi "Coronavirus" la ek pouvwè chinwa ké ni pou konstwi dot lopital adan sé simenn-lan ka vini a, mé omwens, pouvwè-tala mondré ek démontré ki lè politisien lé chaché solision, yo toutafetman kapab touvé'y.
Sof lè yo sanfoutépamal di pep-yo...
Commentaires