A fos bwè let an tété a zetwal A fos pran siren an tout katchimen A fos dérédi chimen pou touvé on ti chans A fos fè lanmè dépalé kon fanm fol A fos poté granjou asi zékal a zié A fos tann loraj voukaré on siel soud A fos dlo sous koulé adan dé zié an mwen A fos koud pawol ki dèyè pawol A fos planté limiè an tout jadin kreyol A fos rouzé lenbé san on gout dlo lapli A fos konpwann tout siro pa miel A fos ba lavi fos A fos touné-viré an fondok a kè aw A fos ped fos pou janbé la dévenn A fos an mandé fos Pou limé on difé èvè fos a zié aw A fos pwan fos An lonbraj a zel aw A fos chaché pouki nou ped chimen Pouki sé vou sé mwen An touvé on lanmou A pa lanmou la kon moun ka kwè Lanmou poudré Lanmou fardé A pa sinéma a lanmou Mè sé lanmou ki bon Lanmou pou bon Lanmou ka monté mon Ka desann an ba dlo Lanmou san kriket ka kriyé Lanmou pon moun pa ka vwè On lanmou an ba fey a lanmou On lanmou ka kléré andidan Ka fè chabon pou brilé tout san aw Lanmou an tout sos Lanmou an tout fos A fos A fos Mi sé sa an touvé Ernest Pépin faugas Le 12 juin 09